इथे कुणाला संग हवा?
                          वरवरचा तर रंग हवा

          विकायला मी सज्ज मला
          असाच सारा ढंग हवा

                           वायद्यासही चुकलेला
                           असा कायदा भंग हवा

          गनीम सख्खा शेजारी?
          हरण्याचा मग चंग हवा

                              तहात भेकड हा येथे
                              रणात कोणी दंग हवा

जणू जिन्दगी......

रात्रीला स्वप्नाने सजवा
स्वप्नाला अश्रूंनी घडवा

त्यांची दु:खे जेथे पिकती
तेथे तुमची कळकळ जिरवा

त्याच उड्या अन त्याच कसरती
खेळ संपता - तंबू हलवा...

नसे जाणता राजा आता
कशास कोणी खिंडी लढवा?

नेता म्हणतो, "सूर्य लपवला -
(जयद्रथांना खुशाल उडवा!)"

धर्म, राजसत्ता अन आम्ही
युगायुगांचा चालू झुलवा...

कळेल का कुणा ॠणानुबंध आपुले कसे
असून सावलीत मी उन्हात बैसले कसे

दवात न्हात राहिले, दवात गात राहिले
झुल्यावरी फुलांपरी मनात डवरले कसे

कपोल गाल, ओठ लाल लाजता उषेपरी
गुलाब गंध प्राशुनी ह्रदय गुलाबले कसे

सुगंध गंध पल्लवीत श्वास्-श्वास गंधता
इथे-तिथे तुझेच सांज रंग उधळले कसे

सखाही तूच, तूच मित्र, तूच जिवलगा तरी
कशास मज विचारता, अखेर भाळले कसे

-  दीपा

याद माझी येत नाही हे ख्ररे का?
त्रास थोडा देत नाही हे खरे का ?

तू निघावे अन् तुला मी  थांबवावे 
हे तुला अभिप्रेत नाही हे खरे का ?

जाळते आहे जिवाला खूप जी,...ती
वेदना गझलेत नाही हे खरे का ?

खूप आहे आज पैसा ...पण मनाला
तो दिलासा देत नाही हे खरे का ?

         मला एवढे पाप करु द्या शेवटचे

         जमले ना अद्याप करु द्या शेवटचे

                नाटक आहे तिसरा अंक जगण्याचे

                होई आपोआप करु द्या शेवटचे

         धाडस म्हणता लढण्यालाच एकाकी?

         जगू द्यात संताप करू द्या शेवटचे

                 नाही राहिले गाणे तुमच्यासाठी

                 आतआत आलाप करु द्या शेवटचे

         तिलाही अवघड नाही निरोप घेणे

         नकोच आता ताप करु द्या शेवटचे 

                           संगतीला संगतीचा...      

                   संगतीला संगतीचा, दोष हा जडला कसा?
                   स्पर्श मी करता गुलाबा, हा असा सुकला कसा?

                   वेदना माझ्या उरीची,आज त्याने ऐकता;
                   तो जरी पाषाण होता; येवढा रडला कसा?

                   चालतो मी वाट काटेरी, कधीची आज पण,
                   देखणा रस्ता फुलांचा, मजकडे वळला कसा?

                   पुत्र सूर्याचा,वीरोत्तम,क्षात्र धर्मी कर्ण तो;
                   द्रौपदीची लाज जाता, गप्प रे बसला कसा?