तुझ्यामुळे...

तुला पाहिले, भान हरपले, तुझ्यामुळे
मीपण माझे  क्षणात विरले, तुझ्यामुळे

तुझे हासणे, जणु कमळाचे हळूच खुलणे
पाहुनिया ते भ्रमरहि फसले, तुझ्यामुळे

तुझे बोलणे, खुदकन हसणे, हळू लाजणे
जग हे किति मज सुंदर दिसले, तुझ्यामुळे

दवबिंदूंचे अळवावरच्या मोती झाले
वेलीवरती फूल उमलले, तुझ्यामुळे

चंद्र उगवला पुनवेचा तो आकाशी, पण
आज चांदणे पिठूर पडले, तुझ्यामुळे

मदनाचे जरी प्रेम रतीवर जिवापाड ते
हृदय तरी त्याचे धडधडले, तुझ्यामुळे

चातक होउन किती किती मी वाट पाहिली
प्रेमरूप हे मेघ बरसले, तुझ्यामुळे

पडली होती अबोल माझी इथे लेखणी
तिला अचानक बोल लाभले, तुझामुळे

साथ मिळाली तुझी नि मजला मार्ग गवसला
सोनेरी आयुष्य जाहले, तुझ्यामुळे