संपेन मी नावानिशी.....

धन्यवाद चित्तरंजन,

खरे तर माझ्यामते त्या शेरांमधे 'माझ्यासारखाचे' प्रयोजन महत्वाचे आहे. लिहायचा प्रयत्न करतो. पण आपल्या स्पष्ट मताचा आदर आहेच. तसेच, त्या शेरांवर पुन्हा विचारही करून बघतो.

आलेच आहे होत, हो खंबीर माझ्यासारखा
संपेन मी नावानिशी, धर धीर माझ्यासारखा

मी कधी एकदा संपतो आहे याकडे इतरच नाहीत तर मीही डोळे लावून बसलो आहे. मी हितशत्रूला सांगत आहे की माझ्यासारखाच खंबीर हो, धीर धर, मी निश्चीत नावानिशी संपेन. आता कारभार आटोपायला आलाच आहे.

खोटे खर्‍यांना मारण्यासाठी सदा शोधायचे
निर्जीव, घातक, गंजका, खंजीर माझ्यासारखा

अभिप्रेत अर्थ - सुर्‍याला स्वतःची बुद्धी नसते. पण त्याचा वार घातक असतो. मी एक गंजलेला सुरा आहे. गंजलेला यासाठी की माझ्यात काहीच चांगुलपणा उरलेला नाही. असा सुरा कुणाच्या कामाचा? मग खोटे लोक खर्‍यांवर वार करण्यासाठी 'माझ्यासारख्याचा' वापर करतात.

होशील का तूही कधी अवखळ प्रवाहासारखी?
होईन का मीही कधी गंभीर माझ्यासारखा?

अभिप्रेत अर्थ - तू कधी अल्लडपणे, दिलखुलासपणे माझ्यावर भाळशील का? तुझ्यावर प्रेम करता करता व त्यात अयशस्वी ठरूनही पुन्हा त्याच प्रेमाची आत्यंतिक इच्छा बाळगताना मीच इतके विदुषकी चाळे करत आलो आहे की मी कधी गंभीर होतो हेच आठवत नाही आहे. मी पुन्हा तसा गंभीर होईन का?

अर्थात, स्पष्टीकरणाची आवश्यकता भासणे हे मी अपयश समजतो. आपल्या प्रतिसादाने बळ आले.
-----------------------------------------------------------------------------------------------------------------------------------

जी पाहिजे ती स्पष्टता नसली तरी 'माझे खरे'
आहे कुठे कोणी इथे माहीर माझ्यासारखा?

-सविनय
बेफिकीर!

सर्वांचे आभार! (पुस्तकात या गझलेत अनेक बदल व काटछाटी केल्या, अर्थातच वकुबाप्रमाणे) :-))