''तुझ्याविना या जगात माझा जगावयाला नकार आहे''

Posted by कैलास on Friday, 28 January 2011

मरुन अस्तित्वहीन होण्या,तुझ्याचसाठी तयार आहे
तुझ्याविना या जगात माझा,जगावयाला नकार आहे

धरून सूर्यास आणले अन ,हजार तेजाळले दिवेही
असा कसा दूर व्हावयाचा,मनातला अंधकार आहे

अचूक आले तुझे नयन बाण्,येथ घायाळ जाहलो मी
शिकार गेलो करावयाला,स्वतःच झालो शिकार आहे

नको धरु आज हात माझा,कठोर ही बाब आठवावी
जगावयाचा प्रवास माझा उद्या तसा संपणार आहे

कधीच कर्जात राहिलो ना ,म्हणून ”कैलास” अंत आला
जगू कसे हे जिणे तसे तर तुझ्याकडूनच उधार आहे.

--डॉ.कैलास गायकवाड

गझल: 
गझल

प्रतिसाद

ज्ञानेश.

शनि, 29/01/2011 - 14:30

मस्त !

शाम

मंगळ, 01/02/2011 - 19:09

नको धरु आज हात माझा,कठोर ही बाब आठवावी
जगावयाचा प्रवास माझा उद्या तसा संपणार आहे. छान!!

शाम

मंगळ, 01/02/2011 - 19:10

.

स्नेहदर्शन

गुरु, 03/02/2011 - 16:51

शिकार गेलो करावयाला,स्वतःच झालो शिकार आहे

झालो हे भुतकाळ आहे आणि आहे हा वर्तमान कहीतरी चुकते आहे

कैलास

गुरु, 03/02/2011 - 21:12

पूर्ण भूतकाळ आहे. कंप्लीट पास्ट टेन्स.

गद्यात असे लिहीले जाईल. स्वतःच शिकार झालो आहे.

पद्यात = स्वतःच झालो शिकार आहे

कमलाकर देसले

शुक्र, 04/02/2011 - 21:17

कैलासजी ,मस्तच

अनिल रत्नाकर

शनि, 05/02/2011 - 00:29

अप्रतिम.
तुझा हात आम्ही उद्याही सोडणार (नाही आहोत.)

विद्यानंद हाडके

गुरु, 17/02/2011 - 14:02

मरुन अस्तित्वहीन होण्या,तुझ्याचसाठी तयार आहे
तुझ्याविना या जगात माझा,जगावयाला नकार आहे............... मस्त मतला , लय सुंदरच

धरून सूर्यास आणले अन ,हजार तेजाळले दिवेही
असा कसा दूर व्हावयाचा,मनातला अंधकार आहे........,..........क्या ब्बात है