सुटे, मोकळे होण्यामध्ये हात जरा गुरफटले होते

Posted by कैलास गांधी on Saturday, 17 July 2010

ज्याच्या नाराजीने सध्या नवीन वादळ उठले होते
हे शोधा कि आधी त्याचे किती जणांशी पटले होते

बाग जरा नाखुशच होती फुलांनीच समजोता केला
नव्या ऋतूंची वाट पाहुनी रंग फुलांचे विटले होते

पाय मोकळे झाल्यावरती उभा राहिला नवाच गुंता
सुटे, मोकळे होण्यामध्ये हात जरा गुरफटले होते

पुसू नका आरसे उगाचच तोंडावर मारत जा पाणी
रोज नव्या रंगानी मुळच्या चेहऱ्यांना बरबटले होते

जीवानिशी जे गेले त्यांच्या मृतदेहांना नाही वाली
लाड तयांचे झाले ज्यांना थोडेसे खरचटले होते

धीर कधीना खचला तरीही या सत्याची जाणीव झाली
शरीर थोडे थकले होते... पाय जरासे दमले होते

....कैलास गांधी

गझल: 
गझल

प्रतिसाद

विश्वस्त

शनि, 17/07/2010 - 18:20

वृत्तानुसार शब्द ऱ्हस्व किंव दीर्घ लिहावेत, ही विनंती.

चित्तरंजन भट

शनि, 17/07/2010 - 18:29

वा. अगदी जोमदार गझल आहे कैलासराव. फार आवडली.

कैलास

शनि, 17/07/2010 - 19:09

वा वा ... हरेक शेर खणखणित...... कैलासजी,कृपया विश्वस्तांच्या सूचनेकडे लक्ष द्यावे.

डॉ.कैलास

गंगाधर मुटे

शनि, 17/07/2010 - 20:32

आवडली गझल.

मानस६

रवि, 18/07/2010 - 22:01

उत्तम रचना
-मानस६

बहर

रवि, 18/07/2010 - 23:57

मतला भयंकरच आवडला... खरं म्हणजे तोच मनात घेऊन बसलो आहे. पुढे वाचलीच नाही. बाकी प्रतिसाद उद्या देतो. माफ करा... (चूक तुमच्या मतल्याचीच आहे!) :)

निलेश कालुवाला

सोम, 19/07/2010 - 09:39

सगळी गझल आवडली.

ह बा

सोम, 19/07/2010 - 12:25

ज्याच्या नाराजीने सध्या नवीन वादळ उठले होते
हे शोधा कि आधी त्याचे किती जणांशी पटले होते

हा शेर फार फार आवडला.

कैलास गांधी

सोम, 19/07/2010 - 16:22

चित्तरंजनजी, कैलासजी, क्रान्ति, निलेश, मानस,बहर, ह बा आणि गंगाधरजी धन्यवाद.
ऱ्हस्व किंव दीर्घ या चुका टाईप करताना होत आहेत अजुन सरावलेलो नाही.
बहर प्रतिक्रीयेची वाट पहातोय...