वर्षे झाली

Posted by योगेश वैद्य on Tuesday, 8 January 2008

 


        त्या जागेवर ती दिसण्याला वर्षे झाली
        तिने फक्त माझे असण्याला वर्षे झाली


                       गर्दीतुनही तिथे अचानक तिने स्वतःहुन
                        नांवगांव माझे पुसण्याला वर्षे झाली


        कुठे तुझे गं मावळले ते रुसणे फुगणे
        अशा तुझ्याही मग नसण्याला वर्षे झाली


                          ओळख देऊन पुन्हा चौकशी हसता हसता
                          ठरलेल्या माझ्याही फसण्याला वर्षे झाली 


        नवा शब्द होता माणुसकी,अर्थही त्याला
        नव्हे,मनावर हे ठसण्याला वर्षे झाली


                           झाडाखाली बसण्याऱ्याला मिळे सावली?
                           विश्वास कुणावर बसण्याला वर्षे झाली

गझल: 
गझल

प्रतिसाद

प्रदीप कुलकर्णी

मंगळ, 08/01/2008 - 22:00

स्वागत....योगेश या संकेतस्थळावर.
गर्दीतूनही तिथे अचानक तिने स्वतःहुन
नांवगांव माझे पुसण्याला वर्षे झाली
वा...वा... फारच छान.
वाद नको   हीही गझल ठीक.

जनार्दन केशव म्...

बुध, 09/01/2008 - 13:15

 त्या जागेवर ती दिसण्याला वर्षे झाली

गर्दीतूनही तिथे अचानक तिने स्वतःहुन
नांवगांव माझे पुसण्याला... वर्षे झाली
बहूत खूब..
मतल्यातील सानी मिसरा अस्वस्थ करतो आहे...
ती फक्त आपलीच असावी या अर्थाने...
म्हणून लिहिला नाही...

पुलस्ति

बुध, 09/01/2008 - 20:56

गझल आवडली.. सर्वच शेर छान! नावगाव हा शेर विशेषच!!

विश्वस्त

मंगळ, 15/01/2008 - 11:04

शेवटच्या द्विपदीतल्या दुसऱ्या ओळीत (वृत्तात बसण्यासाठी) योग्य ते बदल करावेत.  उच्चारानुसार शब्द ऱ्हस्व दीर्घ लिहावेत. "कुठे तुझे ग मावळले ते रुसणे फुगणे" ह्या ओळीतील ग चा पुनर्विचार करावा, ही विनंती.