बंडखोरी

Posted by क्रान्ति on Monday, 23 August 2010

रुढींची भिंत त्याने पाडली
मनाची बंडखोरी वाढली

उरे माझे अभागी झोपडे
पुरी वस्ती जरी ओसाडली

चला, बोली करा, भगवंत घ्या
इथे श्रद्धा विकाया काढली

जरासे स्वच्छ, हलके वाटले,
मनाची ओसरी मी झाडली

जगाचे ऐकले अन् वागले,
तरी तोंडे किती वेंगाडली!

व्यथे, आता तरी तू हो सुखी,
तुझ्यासाठी सुखे लाथाडली

विठू, दे घोंगडी, आताच मी
कुडीची जीर्ण चादर फाडली

गझल: 
गझल

प्रतिसाद

कैलास

सोम, 23/08/2010 - 14:21

जरासे स्वच्छ, हलके वाटले,
मनाची ओसरी मी झाडली

हा शेर खूप आवडला....

सुंदर गझल.

चित्तरंजन भट

सोम, 23/08/2010 - 14:22

उरे माझे अभागी झोपडे
पुरी वस्ती जरी ओसाडली
वावा! फारच आवडला.

जगाचे ऐकले अन् वागले,
तरी तोंडे किती वेंगाडली!
वाव्वा.

एकूण गझलच सुबक व सुरेख! फार आवडली.

बहर

बुध, 25/08/2010 - 00:06

सगळी गझल वाचून झाल्यावर मतला इतका आवडला कि बाकी लिहीत नाही. कुडी आणि घोंगडी ची सांगड मस्त बसली आहे. बाकी गझल पुन्हा वाचेन. पण अत्ता मतलाच पुरे!!!