बदललास तू सहजच रस्ता आता तो सवयीचा झाला

Posted by कैलास गांधी on Wednesday, 18 August 2010

नकोस वेडे प्रश्न विचारू माझ्यापाशी उत्तर नाही
उघडे पडले घाव जुने तर झाकायाला अस्तर नाही

किती वेळ अन दिवस भेटलो याची कोणी गणती केली
त्या त्या वेळी असे म्हणालो आता भेटू नंतर नाही

बदललास तू सहजच रस्ता आता तो सवयीचा झाला
सवयीचा नक्की झाला कि त्यावाचून गत्यंतर नाही

समीप आलो उगिच वाटले खरे समांतर चालत होतो
किती बदलले रस्ते तरिही आपल्यामधले अंतर नाही

नको दरवळू अशी तू तरी तुझा गंध माझ्यात असू दे
बागेमध्ये फूल व्हावया माझ्यापाशी अत्तर नाही

गझल: 
गझल

प्रतिसाद

बहर

बुध, 18/08/2010 - 15:06

गत्यंतर.. अंतर... आवडले. छान गझल.

ज्ञानेश.

गुरु, 19/08/2010 - 08:44

वाव्वा. अतिशय सुंदर गझल कैलासराव.
दुसरा आणि तिसरा शेर फारच सुरेख.

येऊ द्या आणखी.

गंगाधर मुटे

गुरु, 19/08/2010 - 09:31

सुरेख.
मतला आणि नंतर मस्तच.

चित्तरंजन भट

गुरु, 19/08/2010 - 12:26

वा. पहिले चारही शेर चांगले झाले आहेत.

समीप आलो उगिच वाटले खरे समांतर चालत होतो
किती बदलले रस्ते तरिही आपल्यामधले अंतर नाही
खालची ओळ बहुधा वृत्तात नाही. दोघांमध्ये कदाचित चालून जावे.

कैलास गांधी

गुरु, 19/08/2010 - 15:53

चित्तदा
समीप आलो उगिच वाटले खरे समांतर चालत होतो
किती बदलले रस्ते तरिही दोघांमधले अंतर नाही

असे केले तर चालेल ना?

बेफिकीर

सोम, 23/08/2010 - 13:09

सुंदर गझल! खूप आवडली.

आपल्यामधे असे हवे आहे का? तसेच, त्यावा'चु'न हवे आहे का?

गझल फार आवडली.

अभिनंदन!

-'बेफिकीर'!

क्रान्ति

सोम, 23/08/2010 - 13:15

वा! गझल आवडली.

ह बा

मंगळ, 24/08/2010 - 11:53

सगळी गझल आवडली. खूप छान!!!