चाललो निघून मी

Posted by केदार पाटणकर on Tuesday, 8 September 2009

बंद घे करून दार...चाललो निघून मी
पावले न थांबणार..चाललो निघून मी

सारखा कसा फसेन हासण्यास त्या तुझ्या ?
मी बये तसा हुषार..चाललो निघून मी

हा तुझ्यामुळेच घोळ, तूच निस्तरून जा
फक्त तू जबाबदार --- चाललो निघून मी

राहिलीस तू अजिंक्य एवढे करुनही
चल, मला कबूल हार..चाललो निघून मी

मी पुन्हा न भेटणार, परतणारही न मी
फैसला न बदलणार..चाललो निघून मी

द्यायचा कसा निरोप आज सांगतो तुला
हास फक्त एकवार.......चाललो निघून मी

येथल्या फुलांमधे न गंध, रंग राहिले
शोधण्या नवी बहार..चाललो निघून मी

गझल: 
गझल

प्रतिसाद

भूषण कटककर

मंगळ, 08/09/2009 - 12:00

व्वा! आपल्या गझला फार सहज असतात.
ही गझल खूप आवडली.

पाहिजेस तू इथेच, पाहिजे गझल तुझी
बदल यार हा विचार... 'चाललो निघून मी'

-सविनय
बेफिकीर!

क्रान्ति

मंगळ, 08/09/2009 - 18:00

वा! खासच गझल!

'बेफिकीर' द्विपदी पण मस्तच!

चित्तरंजन भट

मंगळ, 08/09/2009 - 20:27

वा! गझल, तिची जमीन, तिची सहजता आणि मूड फार आकर्षक आहे. फार आवडली.

अजय अनंत जोशी

गुरु, 10/09/2009 - 09:40

फारच सुन्दर !
सहज गझलांमधील उत्कृष्ट गझल!
व्वा!

चक्रपाणि

गुरु, 10/09/2009 - 12:48

चित्तंशी सहमत. गझल छान आहे; आवडली. 'बये तसा हुषार' मधला खोचकपणा/टोकदारपणा विशेष आवडला, लक्षात राहीलसा वाटला. निरोप देण्याचा शेरही फारच भावला. जियो!

विश्वनाथ तु. साळेकर

गुरु, 10/09/2009 - 16:04

फारच सुन्दर !

व्वा! व्वा! व्वा!

केदार पाटणकर

सोम, 14/09/2009 - 09:18

धन्यवाद, सर्वांना.